09.04.2018 up
快與閨蜜到Dear Lily朝聖
話說係網上講到熱烘烘的Dear Lily位於中環ifc的P4層。早排係Facebook睇完消息,就已經同閨蜜約好Weekend要黎潮聖!由於見到Openrice的分享要排成2個鐘先有得食,所以今次我就揀左星期日的5:30pm就到餐廳。 

餐廳主要分室內及室外,到呢間餐廳,當然要坐入室內睇佢的Design啦!一入到去已經聞到淡淡的薰衣草味道,餐廳職員都好快就安排了座位比我們。
 

餐廳唔算大,係門口左右兩眼就睇得曬。另外,餐廳的裝飾真係超級超級華麗!除左整個天花板都倒吊薰衣草外,四處的裝飾都非常精緻!
 

就連調配Cocktail的地方都令人目不暇給!


就算每張餐枱都掛住小小的裝飾。 


餐廳於下午3-6點會提供Afternoon Menu,價錢由$78-218,由黑松露薯條、雞翼、漢堡、凍肉芝士拼盤都有。
 

由於我們兩個女仔都唔係好肚餓,所以就只係叫左一份雞肉凱撒沙律及一份黑松露薯條。沙律份量適中,配料除左有雞肉、生菜外,仲有鯷魚、温泉蛋、煙肉、麵包粒及Parmesan Cheese。沙律的味道好豐富,除左有芝士鹹香、鯷魚的鮮味。想讚的係沙律唔會有太厚的醬汁,不過略嫌生菜唔夠脆口。
 

至於黑松露薯條,餐廳用左幼身薯條,炸得金黃香脆的幼著條,配住香濃的黑松露,真係好惹味。
 

另外,餐廳都提供多款Signature Cocktail,每一款都有不同的背後Message,大家可以再細味每款的意景。
 

我就揀左Mademoiselle Lily,Vodka做base,加入荔枝及莓的甜味,就算唔飲開酒的我都好易入口,而且酒的濃度都唔算好高。
 

另外,閨蜜叫Kiki,所以就叫左Kiki de Montparnasse。
 

用了Gin及Sake做酒的Base,再加入了蘋果汁給芒果Puree,味道好fresh,好適合夏天飲。 


同閨蜜傾傾下,天色開始暗,餐廳的燈色都適當地調暗,餐廳仲將已經燃點的小蠟燭放到每張枱上,令餐廳更有情調。
 

埋單時已經7點,但我卻見唔到排隊的人龍。如果大家有興趣黎Dear Lily的,就算遲左到達中環的,都可以去試下睇下有無位。 

另外一提,餐廳無論餐單及職員都係以英文為主,現場唔多覺有香港人職員,所以唔熟英文的朋友孖住個英文叻D的朋友哦。

餐廳:Dear Lilly
地址:中環金融街8號國際金融中心商場4樓4010號舖

| 品牌合作 | 出席活動 | 產品試用 | Email : bingfooddelivery@gmail.com