聖誕必去♥ 2大商場超萌景點登場!
 臨近聖誕,唔少商場都已經佈置得好有特色,而今次小編就要同大家推介佈滿可愛卡通嘅商場佈置(๑╹◡╹๑)

【The ONE‧皇室堡 x RilakkumaTM輕鬆小熊TM聖誕快樂聯「萌」】
今個聖誕,慵懶嘅輕鬆小熊仲帶埋好友茶小熊一齊去到THE ONE,仲令到商場變成甜蜜小鎮,同大家一齊渡過SWEET爆嘅聖誕佳節(*°ω°*ฅ)*



新角色「茶小熊」其實住喺蜜糖森林入面,佢同「小白熊」做咗好朋友之後,「小白熊」仲帶佢去見「輕鬆小熊」同「小雞」,而THE ONE 就以蜜糖為主題,特設咗6大甜蜜場景,而家即刻睇吓有咩影相位啦~



1. 甜蜜森林@地下露天廣場
The ONE呢個甜蜜「心」林,係日本以外全球首個以輕鬆小熊為主題嘅戶外燈飾佈置嚟架~大家仲可以睇住當日「小白熊」係點同「茶小熊」相遇添~大家又見唔見到「輕鬆小熊」偷偷地哩埋咗喺叢林入面呢?



2. 紅色聖誕大屋@UG2中庭

睇完甜蜜「心」林之後,一定要嚟呢個紅色聖誕大屋度打卡啊‹‹\(´ω`)/››約2米高嘅輕鬆小熊絕對係影相靚位~而且旁邊仲有出雙入對嘅「小白熊」同「茶小熊」添~見到佢哋咁SWEET,仲唔快啲拉埋男友一齊合照?



3. 甜蜜蜜蛋糕噴池@UG2中庭
咦?視蜜糖如命嘅「小茶熊」、「輕鬆小熊」同埋「小白熊」原來一齊研發緊超香甜嘅蜜糖啊~♥呢個「甜蜜蜜蛋糕噴池」就係佢哋炮製蜜糖嘅地方啦~!



4. 甜蜜回憶製作所@UG2中庭
自拍完一輪之後,妳仲好想同咁可愛嘅小熊一齊錄條得意Video?只要嚟到「甜密回憶製作所」,妳就可以入去同輕鬆小熊拍低獨一無二嘅影片啦~拍完之後一於即刻Share上facebook同IG,等大家羨慕吓啦!



5. 黃金糖果屋@UG2中庭
呢度話明係甜蜜小鎮,齋影相拍片係唔夠架!仲要嚟到「黃金糖果屋」,入去「小雞」店長悉心打理嘅糖果屋度Shopping吓~將甜甜嘅糖果買返去送俾摯愛同家人啦~



6. 聖誕樂郵郵@UG2中庭
最後嘅影相位就係呢個咁可愛嘅「聖誕樂郵郵」啦~「輕鬆小熊」佢哋已經將滿滿嘅心意寫入聖誕卡入面,仲準備要寄出去添!記得同佢哋影返張相做見證啊(*´з`*)

【皇室堡x RilakkumaTM輕鬆小熊TM 夢幻雪國】
除咗The ONE之外,「輕鬆小熊」仲帶埋3米高巨型飄雪水晶球嚟到皇室堡!去完溫暖嘅甜蜜小鎮之後,一於去埋充滿冬日氣息嘅夢幻雪國啦~呢度唔單止有影相位,妳仲可以玩埋全港首個商場室內旋轉滑梯添!即刻睇吓夢幻雪國嘅6大遊玩國度先!



1. 旋轉聖誕樹小木屋
呢個「輕鬆小熊」聖誕樹小屋有成4.5米高~而「輕鬆小熊」、「小白熊」」、「茶小熊」同「小雞」都已經戴晒誕帽等住同大家影相啦ヾ(●゜▽゜●)♡



2. 夢幻飄雪水晶球
妳以為水晶球只係擺設?原來大家可以走入去3米高嘅水晶球入面,同「輕鬆小熊」一齊體驗漫天飄雪嘅浪漫感覺架( ♥д♥) 呢個影相位一定唔可以錯過!



3. 禮物滿載聖誕「熊」橇車
「輕鬆小熊」出名懂得悠悠閒閒咁過生活,所以即使佢化身成為咗聖誕老人,佢都仍然會只係好寫意咁攤喺雪橇車上面,呢個時候,妳只要一齊坐埋去HEA住咁影相就夠架啦(♡˙︶˙♡)



4. 「熊」之友誼日式小燈塔
「小白熊」同「茶小熊」真係一見如故,非常老友!佢哋仲約埋去日式小燈塔旁邊,一齊堆聖誕雪「熊」添!



5. 冰雪迴旋滑梯
影完靚相,當然要玩返夠本啦!呢個全港首個商場室內冰雪迴旋滑梯,設置喺商場嘅地下中庭位置,大家可以由造型可愛嘅「輕鬆小熊金黃色小木屋」度向下滑,滑入放滿仿似水晶咁嘅透明小球及18厘米高「輕鬆小熊」公仔波波池入面,真係玩到唔捨得走啊( *¯ ³¯*)♡



6. 暖笠笠「鬆」餅塔
除咗迴旋滑梯之外,要記得玩埋呢個暖笠笠「鬆」餅塔啊~大家要將所有紅色鬆餅擊走,而「輕鬆小熊」仲可以輕輕鬆鬆攤喺黃色鬆餅上面嘅話,咁先算贏架!完成任務之後仲可以獲得crostini曲奇餅一份添~最開心就梗係又食又玩又拎禮物啦~♥